Дэлхийн зах зээл дээрх газрын тосны үнэ сүүлийн дөрвөн сарын хугацаанд тасралтгүй өссөөр газрын тосны үнэ баррель 110-120 ам.долларт хэлбэлзэж ирсэн байдаг. Монгол Улсын хувьд ОХУ-аас шатахууныг дэлхийн зах зээлийн үнээр худалдаж авдаг. Өнгөрсөн дөрөвдүгээр сараас Аи-92 автобензиний импортын хилийн үнэ байнга нэмэгдэж, шатахууны үнэ өсөхөд хүрсэн тул УУХҮЯ-наас ОХУ-ын “Роснефть” компанитай хэлэлцээр хийж, тонныг нь 840 ам.доллараар буюу 25 хувийн хөнгөлөлтэй үнээр нийлүүлэхээр тохиролцсон. Үүний үр дүнд АИ-92 автобензиний үнийг 2390 төгрөгт он дуустал тогтвортой байлгахаар нийлүүлэгчидтэй тохирсон байна. Өөрөөр хэлбэл, Монгол Улс, Засгийн газрын зүгээс ОХУ-ын “Роснефть” компанитай олон удаагийн хэлцэл дүнд өнөөдөр нэг тонн АИ-92 автобензинийг 840 ам.доллараар буюу дэлхийн зах зээлийн ханшаас 25-30 хувийн хямд үнээр худалдан авч, дотоодын зах зээлд борлуулж байна. Мөн Ерөнхий сайд Л.Оюун-Эрдэнэ ОХУ-ын Гадаад хэргийн сайд С.Лавровыг Монголд айлчлах үеэр өргөн хэрэглээний АИ-92 автобензиний үнийг энэ он дуустал нэмэхгүй байх талаар ярилцаж, хэлэлцээр үр дүнд хүрсэн. Цаашид өргөн хэрэглээний АИ-92 автобензиний үнийг нэмэхгүй байх тал дээр Засгийн газар, УУХҮЯ, Импортлогч компаниудын зүгээс ОХУ, БНХАУ-тай хэлэлцээ хийн ажиллаж байна.
© 2016 он. Зохиогчийн эрх хуулиар хамгаалагдсан. Хөгжүүлэгч: Onlinemedia.mn
Сэтгэгдэл бичих